نیا ناظم آباد باسکٹ بال کورٹ کا افتتاح 5 فروری کو ہوگا، یوم یک جہتی کشمیر فیسٹیول میچ بھی کھیلا جائے گا۔ غلام محمد خان
کراچی (نیوز اپ ڈیٹس) کراچی باسکٹ بال ایسوسی ایشن کے صدر غلام محمد خان نے نیا ناظم آباد کے سی ای او عارف حبیب سے نیا ناظم آباد میں بے مثال باسکٹ بال کورٹ کی تعمیر پر ایسوسی ایشن کی جانب سے اظہار تشکر کرتے ہوئے نیا ناظم آباد اسپورٹس کمیٹی کے رکن انٹرنیشنل فٹ بال کوچ ناصر اسماعیل سے ملاقات میں درخواست کی کہ نیا ناظم آباد کی جانب سے نو تعمیر خوب صورت باسکٹ بال کورٹ پر باسکٹ بال کھیل کی سرگرمیوں کا جلد از جلد آغاز کیا جائے جسے ناصر اسماعیل نے قبول کرتے ہوئے کہا کہ نیا ناظم آباد باسکٹ بال کورٹ پر کراچی باسکٹ بال ایسوسی ایشن باسکٹ بال کھیل کے لیے اپنا جو بھی کردار ادا کرے گی، نیا ناظم آباد انتظامیہ بھر پور تعاون کرے گی۔ ملاقات میں فیصلہ کیا گیا کہ5 فروری یوم یک جہتی کشمیر کے موقع پر نیا ناظم آباد باسکٹ بال کورٹ کا پروقار تقریب میں باقاعدہ افتتاح کیا جائے گا۔ نیا ناظم آباد ٹرسٹ کے ایگزیکٹیو ڈائریکٹر صمد حبیب باسکٹ بال کورٹ کا افتتاح کریں گے، اس موقع پر کورٹ پر یوم یک جہتی کشمیر فیسٹیول میچ بھی کھیلا جائے گا جس میں کراچی کے نام ور باسکٹ بال پلیئر سمیت انٹرنیشنل باسکٹ بال پلیئر بھی جلوہ گر ہوں گے۔ افتتاحی تقریب میں نیا ناظم آباد کے روح رواں سابق فرسٹ کلاس کرکٹر عارف حبیب، سابق ٹیسٹ کرکٹر اقبال قاسم، اولمپئن اصلاح الدین، کراچی کی معروف سیاسی و سماجی شخصیت محمد سلیم خمیسانی، ڈپٹی ڈائریکٹر انفارمیشن بلدیہ کورنگی محمد ارشد، نیشنل بینک اسپورٹس کے پبلک ریلیشن آفیسر عظمت اللہ خان اور دیگر شرکت کریں گے۔ تقریب میں کراچی باسکٹ بال ایسوسی ایشن کی جانب سے سابق فرسٹ کلاس کرکٹر نیا ناظم آباد کے روح رواں عارف حبیب کو یوم یک جہتی کشمیر اسپورٹس ایوارڈ بھی دیا جائے گا۔
No comments:
Post a Comment