سندھ فوڈ اتھارٹی کا چھاپہ: واٹر پمپ پر واقع مشہور ریسٹورنٹ "خان بروسٹ" کو تنبیہ اور جرمانہ

اتھارٹی کی جانب سے عوام کو صاف اور معیاری خوراک کی فراہمی کے لیے کراچی میں مضر صحت اشیاءاستعمال کرنے والوں کے خلاف کارروائیوں کا سلسلہ جاری ہے۔ ڈائریکٹر سندھ فوڈ اتھارٹی ڈاکٹر ابرار شیخ  

کراچی (اسٹاف رپورٹر) سندھ فوڈ اتھارٹی کا چھاپہ، واٹر پمپ ایف بی ایریا پر واقع مشہور ریسٹورنٹ ”خان بروسٹ“ کی انتظامیہ کو 50 ہزار روپے جرمانہ دو ہفتے کی مہلت دے دی، دوسری کارروائی میں بیکری کارخانہ سیل کر دیا گیا۔ سندھ فوڈ اتھارٹی کے ڈائریکٹر ڈاکٹر ابرار شیخ کے مطابق اتھارٹی عوام کو صاف اور معیاری خوراک کی فراہمی کے لیے کراچی میں مضر صحت اشیاءاستعمال کرنے والوں کے خلاف کارروائیوں کا سلسلہ جاری ہے۔

 ڈاکٹر ابرار شیخ نے بتایا کہ سندھ فوڈ اتھارٹی نے ملک انور گوٹھ کے علاقے میں ایک کارخانے اور گلبرگ کے علاقے واٹر پمپ پر واقع ایک ریسٹورنٹ ”خان بروسٹ“ پر چھاپہ مارا۔ کار خانے میں بیکری آئٹم جس میں پاپے، بن وغیرہ تیار کیے جاتے تھے، انسپکشن کے دوران حفظان صحت کے اصولوں کی خلاف ورزی کرتے ہوئے پائے گئے اور صفائی ستھرائی کی ناقص صورت حال سامنے آئی۔ انسپکشن کے دوران یہ چیز بھی سامنے آئی کے استعمال ہونے والا دیگر خام مال ناقص ہے اور اس استعمال ہونے والے خام مال کی کوئی رسید بھی موجود نہیں تھی۔ انہوں نے بتایا کہ انسپکشن کے دوران کارخانے میں موجود سانچے (Trays) جن میں بیکنگ کی جاتی ہے وہ سب زنگ آلود ہو چکے تھے، کار خانے میں جو تیل استمعال کیا جا رہا تھا وہ کھلا تیل تھا جس پر سندھ فوڈ اتھارٹی نے پابندی عائد کی ہوئی ہے، 

اس کے علاوہ تیاری میں جو کلر استمال کیا جا رہا تھا وہ فوڈ گریڈ کے بجائے ٹیکسٹائل کلر تھا۔ ڈاکٹر ابرار شیخ کا کہنا تھا کہ گلبرگ واٹر پمپ پر واقع ریسٹورنٹ ”خان بروسٹ“ پر بھی یہ دیکھا گیا کہ ایک ہی تیل کو بار بار استمعال کیا جا رہا تھا، اس کے علاوہ جو ورکر وہاں کام کر رہے تھے، ان کی حالت بھی درست نہیں تھی اور نہ ان کا میڈیکل کرویا گیا تھا۔ انہوں نے بتایا کہ ان تمام چیزوں کو دیکھتے ہوئے سندھ فوڈ اتھارٹی نے کارروائی کرتے ہوئے کار خانے کو سیل کردیا اور ریسٹورنٹ کو 50 ہزار روپے جرمانہ کرتے ہوئی دو ہفتے کی مہلت دے دی ہے۔