ایڈیشنل آئی جی کراچی ڈاکٹر امیر احمد شیخ نے شہر کے 4 تھانوں اور ایک ٹریفک سیکشن کا اچانک دورہ

سپاہ کی فلاح و بہبود اور صفائی ستھرائی میں عدم دل چسپی پر ایک ڈی ایس پی اور3 ایس ایچ اوز معطل جب کہ اچھی کارکردگی پر ڈی ایس پی، ایس ایچ او اور ایس آئی او کو تعریفی سرٹیفکیٹ اور35 اہل کاروں کو نقد بھی انعامات دیے

کراچی (نیوز اپ ڈیٹس) ایڈیشنل آئی جی کراچی ڈاکٹر امیر احمد شیخ نے شہر کے4 تھانوں اور ایک ٹریفک سیکشن کے اچانک دوروں کے دوران سپاہ کی فلاح و بہبود اور صفائی ستھرائی میں عدم دل چسپی پر ایک ڈی ایس پی اور3 ایس ایچ اوز کو معطل کر دیا جب کہ ایک ڈی ایس پی، ہیڈ محرر اور ڈیوٹی افسر سے وضاحت طلب کرلی۔ کراچی پولیس چیف نے اچھی کارکردگی پر ڈی ایس پی، ایس ایچ او اور ایس آئی او کو تعریفی سرٹیفکیٹ اور35 اہل کاروں کو نقد بھی انعامات دیے۔ سی سی پی او ڈاکٹر امیر احمد شیخ سب سے پہلے ڈاکس تھانے پہنچے جہاں صفائی نہ ہونے پر ڈی ایس پی جیکسن، ہیڈ محرر اور ڈیوٹی افسر سے وضاحت طلب کر لی گئی جب کہ مچھر کالونی میں منشیات فروشی روکنے میں ناکامی پر ایس ایچ او ڈاکس کو فوری طور پر معطل کر دیا۔ انہوں نے لیاری کے کلری تھانے میں اسلحہ خانے کا معائنہ کیا اور ہتھیاروں کی بہترین دیکھ بھال پر ڈاکٹر امیر شیخ نے اسلحہ خانے کے انچارج کو نقد انعام دیا جب کہ کلری تھانے کے مجموعی طور پر22 اہل کاروں کو باوردی درست اور چاق و چوبند ڈیوٹی دینے پر انعامات سے نوازا۔ ایڈیشنل آئی جی کراچی ڈاکٹر امیر احمد شیخ کھارادر اور میٹھادر تھانوں میں پہنچے تو ڈی ایس پی، ایس ایچ اوز اور دیگر دفاتر چمک دمک رہے تھے جب کہ اوپر کی منزل پر گندگی کے ڈھیر لگے ہوئے تھے اور عمارت کچرا کنڈی کا نمونہ پیش کر رہی تھی، بیرکس کی چھت کا پلستر جگہ جگہ سے اکھڑ رہا تھا۔ ڈاکٹر امیر احمد شیخ نے اسے پولیس افسران کی سپاہ کی فلاح و بہبود میں عدم دل چسپی قرار دیا۔ انہوں نے ڈی ایس پی کھارادر اور کھارادر میٹھادر تھانوں کے ایس ایچ اوز کو معطل کر دیا۔ انہوں نے کھارادر اور میٹھادر تھانے میں صفائی ستھرائی میں مصروف ریٹائرڈ ضعیف خاتون کو2000 روپے انعام دیا جب کہ ڈی ایس پی بغدادی، ایس ایچ او اور ایس آئی او کلری کو اچھی کارکردگی پر سرٹیفکیٹ دینے کا اعلان کیا۔