پاکستان میڈیکل ایسوسی ایشن کا ایک دیرینہ مطالبہ سندھ حکومت نے پورا کر دیا

پی ایم اے حکومت سندھ کو یہ بل پیش کرنے پر مبارک باد پیش کرتی ہے جو مریضوں اور خاص طور پر شدید زخمی مریضوں کی جان بچانے کے لیے بہت ضروری تھا کیوں کہ معصوم لوگ اسپتالوں کے شعبہ حادثات میں مر رہے تھے، یہ قانون سازی اسپتالوں کی ایمرجنسی میں آنے والے متاثرہ افراد کے لیے بہت فائدہ مند ثابت ہوگی، ڈاکٹر ایس ایم قیصر سجاد

کراچی (اسٹاف رپورٹر) پاکستان میڈیکل ایسوسی ایشن کا ایک دیرینہ مطالبہ سندھ حکومت نے پورا کر دیا۔ انہوں نے سرکاری و پرائیویٹ اسپتالوں میں زخمیوں کو ترجیحی بنیاد پر مفت ہنگامی علاج کی فراہمی کا بل اسمبلی میں پیش کیا۔ ان خیالات کا اظہار پی ایم اے سینٹر کے سیکریٹری جنرل ڈاکٹر ایس ایم قیصر سجاد نے اپنے ایک بیان میں کیا۔ ڈاکٹر ایس ایم قیصر سجاد کا کہنا تھا کہ پی ایم اے حکومت سندھ کو یہ بل پیش کرنے پر مبارک باد پیش کرتی ہے جو مریضوں اور خاص طور پر شدید زخمی مریضوں کی جان بچانے کے لیے بہت ضروری تھا کیوں کہ معصوم لوگ اسپتالوں کے شعبہ حادثات میں مر رہے تھے، یہ قانون سازی اسپتالوں کی ایمرجنسی میں آنے والے متاثرہ افراد کے لیے بہت فائدہ مند ثابت ہوگی۔ انہوں نے کہا کہ ہمارے ملک میں بہت سے قاعدے قوانین موجود ہیں لیکن ان قوانین کو اکثر نظر انداز کیا جاتا ہے، ہم اب چاہتے ہیں کہ قوانین پر سختی سے عمل درآمد کروایا جائے، ہم حکومت سے یہ بھی گزارش کرتے ہیں کہ وہ میڈیکو لیگل خدمات کا دائرہ پرائیویٹ اسپتالوں تک بھی پہنچائیں اور کراچی کے ہر ضلع میں کم از کم چار پرائیویٹ اسپتالوں میں میڈیکو لیگل کے دفاتر قائم کیے جائیں، اس کے علاوہ اس بات کو یقینی بنایا جائے کہ کسی بھی زخمی کو اسپتال لانے والے شخص کو بلاوجہ پریشان اور ہراساں نہ کیا جائے۔ انہوں نے کہا کہ پی ایم اے وفاقی حکومت سے مطالبہ کرتی ہے کہ اس طرح کے قوانین بنا کر ہیلتھ کیئر کمیشن کے تحت پورے پاکستان کے اسپتالوں میں نافذ کیے جائیں۔