آرٹس کونسل آف پاکستان کراچی بین الاقوامی سطح پر پاکستان کی مثبت شناخت قائم کرنے میں اہم کردار ادا کر رہا ہے، مرتضیٰ وہاب

آرٹس کونسل آف پاکستان کراچی اور بالخصوص صدر آرٹس کونسل آف پاکستان کراچی محمد احمد شاہ نے کراچی اور سندھ کے طلبہ کو موقع فراہم کیا کہ وہ ہنر سیکھ سکیں اور حقیقی زندگی میں اس ہنر کا استعمال کر سکیں، آرٹس کونسل انسٹی ٹیوٹ آف آرٹس اینڈ کرافٹس سے فارغ ہونے والے طلبہ کے مقالہ جات کی نمائش سے خطاب

کراچی (نیوز اپ ڈیٹس) مشیر اطلاعات سندھ مرتضیٰ وہاب نے کہا ہے کہ آرٹس کونسل آف پاکستان کراچی اور بالخصوص صدر آرٹس کونسل آف پاکستان کراچی محمد احمد شاہ نے کراچی اور سندھ کے طلبہ کو موقع فراہم کیا کہ وہ ہنر سیکھ سکیں اور حقیقی زندگی میں اس ہنر کا استعمال کر سکیں۔ وہ آرٹس کونسل آف پاکستان کراچی میں آرٹس کونسل انسٹی ٹیوٹ آف آرٹس اینڈ کرافٹس سے فارغ ہونے والے طلبہ کے مقالہ جات کی نمائش سے خطاب کر رہے تھے۔ اس موقع پر صدر آرٹس کونسل آف پاکستان کراچی محمد احمد شاہ بھی ان کے ساتھ موجود تھے۔ مرتضیٰ وہاب نے آرٹس کونسل سے فارغ ہونے والے طلبہ کو مبارک باد پیش کی اور کہا کہ حکومت سندھ اور وہ ذاتی طور پر فارغ ہونے والے طلبہ سے تعاون کی ہر ممکن کوشش کریں گے۔

 انہوں نے کہا کہ آرٹس کونسل آف پاکستان کراچی پاکستان اور سندھ کے مثبت امیج، صوفی ازم اور تہذیب کو پروان چڑھانے میں اہم ادارے کی حیثیت اختیار کر گیا ہے اور بین الاقوامی سطح پر پاکستان کی مثبت شناخت قائم کرنے میں اہم کردار ادا کر رہا ہے۔ انہوں نے آرٹس کونسل آف پاکستان کراچی کے منظر اکبر ہال میں جاری مقالہ جات نمائش کا دورہ بھی کیا اور طلبہ و طالبات کی تیار کردہ پینٹنگز، ڈیزائنز اور ڈیجیٹل پینٹنگز کا معائنہ بھی کیا۔ اس موقع پر صدر آرٹس کونسل آف پاکستان کراچی نے مرتضیٰ وہاب کو پھولوں کا گل دستہ بھی پیش کیا۔ واضح رہے کہ آرٹس کونسل آف پاکستان کراچی میں جاری تین روزہ مقالہ جات نمائش اتوار تک جاری رہے گی جس میں آرٹس کونسل آف پاکستان کراچی سے ڈگری حاصل کرنے والے دس طلبہ کی تیار کردہ پینٹنگز، گرافکس اور ٹیکسٹائل ڈیزائنز کے نمونے پیش کیے جائیں گے۔