کراچی: سال نو کی آمد پر ہوائی فائرنگ سے بچی سمیت 19 افراد زخمی

کراچی (نیوز اپ ڈیٹس) شہر قائد کے مختلف علاقوں میں سال نو کے موقع پر ہوائی فائرنگ کے واقعات میں کم سن بچی سمیت 19 افراد زخمی ہوگئے۔ پولیس حکام کے مطابق لیاقت آباد، ناظم آباد، لیاری، کینٹ اسٹیشن، پرانی سبزی منڈی، لانڈھی، گلستان جوہر، گارڈن، ایف بی ایریا، ایئر پورٹ، نارتھ ناظم آباد، طارق روڈ اور رنچھوڑ لائن سمیت دیگر علاقوں میں نئے سال کی آمد پر ہوائی فائرنگ کے واقعات رپورٹ ہوئے۔ پولیس کا کہنا ہے کہ عائشہ منزل پر ہوائی فائرنگ کے نتیجے میں دو خواتین اور7 سالہ بچی بھی زخمی ہوئی جسے فوری طبی امداد کے لیے اسپتال منتقل کردیا گیا۔ ذرائع کا کہنا ہے کہ نیو ٹاؤن پولیس نے آتش بازی کرنے والے 5 نوجوانوں کو گرفتار بھی کر لیا ہے۔