ضلع شرقی: یوسی 27 گلستان جوہر بلاک 1 میں سڑکوں کی استر کاری کا کام مکمل کر دیا گیا

کراچی (نیوز اپ ڈیٹس) بلدیہ شرقی کی جانب سے شہریوں کو بہترین بلدیاتی سہولتوں کی فراہمی کا سلسلہ جاری، یوسی27 گلستان جوہر بلاک 1 میں سڑکوں کی استر کاری کا کام مکمل کردیا گیا ہے۔ چیئرمین بلدیہ شرقی معید انور نے یوسی27 کے چیئرمین احترام الحق کے ساتھ دورہ کر کے ترقیاتی کاموں کا معائنہ کیا اور علاقہ مکینوں کی جانب سے ترقیاتی کاموں کے پایہ تکمیل کے سلسلے میں منعقدہ تقریب میں شرکت کی۔ تفصیلات کے مطابق گلستان جوہر بلاک 1 کی اندرونی گلیوں کی خستہ حالت کا بلدیاتی نمائندوں نے فوری نوٹس لیتے ہوئے ترقیاتی کاموں کا آغاز کرایا۔ چیئرمین معید انور نے اس موقع پر بات چیت کرتے ہوئے کہا کہ اچھی سڑکیں اور اچھا ماحول عوام کا حق ہے، یہ سہولتیں عوام تک منتقل کر کے ہم نے اپنا فریضہ ادا کیا ہے جس طرح محدود وسائل میں رہتے ہوئے عوام کو سہولتیں منتقل کی جا رہی ہیں وہ یقیناً ہمار ے منتخب بلدیاتی نمائندوں کی محنت اور لگن کا منہ بولتا ثبوت ہیں۔ انہوں نے کہا کہ ہم ضلعی سطح پر عوام کے لیے ہر ممکن سہولتوں کی فراہمی یقینی بنا رہے ہیں، جو وسائل دست یاب ہیں انہیں عوام کے مسائل دور کرنے کے لیے بلا تفریق استعمال میں لایا جا رہا ہے، گلستان جوہر کا یہ دیرینہ مسئلہ تھا جسے حل کیا گیا ہے اب آپ کی ذمے داری ہے کہ اس کی دیکھ بھال کریں، خاص طور پر سڑکوں پر بلاوجہ کھدائی کے عمل کی روک تھام کے لیے کردار ادا کیا جائے، ہماری بھی کوشش ہے کہ ضلع بھر میں سڑکوں کی دیکھ بھال کے نظام کو بہتر بنایا جائے۔ اس دوران انہوں نے زیر تعمیر سڑکوں کے کام کا بھی تفصیلی معائنہ کیا۔ تقریب میں دیگر معززین نے بھی شرکت کی۔