فیس بک میسنجر میں بھی پیغامات کے خاتمے کا آپشن آگیا

کراچی (نیوز اپ ڈیٹس) فیس بک میسنجر نے بھی بھیجے گئے پیغامات کو ڈیلیٹ کرنے کا آپشن متعارف کرا دیا ہے۔ اسی لیے اب اگر آپ کسی کو غلطی سے یا غصے میں کوئی غیر اخلاقی پیغام بھیج بھی دیں تو پریشانی کی بات نہیں کیوں کہ یہ پیغام صرف دس منٹ کے اندر اندر ختم ہو سکتا ہے۔ یہاں ایک بات کا خیال رکھنے کی خاص ضرورت ہے اور وہ ہے وقت یعنی فیس بک کے میسنجر میں پیغامات ختم کرنے کا آپشن تو آ گیا ہے تاہم اس کا استعمال پیغام بھیجنے کے دس منٹ کے اندر اندر کیا جا سکتا ہے اس کے بعد نہیں۔ مثال کے طور پر آپ نے کسی کو کوئی ایسا پیغام بھیج دیا ہے جو آپ ختم کرنا چاہتے ہیں تو اس پیغام پر کلک کریں۔ کلک کرنے پر آپ کے سامنے دو آپشنز آئیں گے ایک ہوگا ”سب کے لیے آپ کا پیغام ختم کردیا جائے“ جب کہ دوسرا آپشن یہ ہوگا کہ ”آپ کا پیغام آپ کے لیے ختم کردیا جائے۔“ آپ کو اس میں سے ایک آپشن منتخب کرنا ہوگا اور وہ پیغام غائب ہو جائے گا۔