سپریم کورٹ کے حکم پر کراچی رجسٹری کے باہر سیکیورٹی خدشات کے پیش نظر رکھی گئیں رکاوٹوں کو فوری طور پر ہٹادیا گیا

کراچی (نیوز اپ ڈیٹس) سپریم کورٹ کے حکم پر کراچی رجسٹری اور اس سے متصل عمارتوں کے باہر سیکیورٹی خدشات کے پیش نظر رکھی گئیں رکاوٹوں کو فوری طور پر ہٹادیا گیا ہے۔سپریم کورٹ کراچی رجسٹری میں غیرقانونی بل بورڈز اور سائن بورڈز کی تنصیب کے حوالے سے کیس کی سماعت ہوئی۔ عدالت میں کنٹونمنٹ بورڈ کی رپورٹ پیش کی گئی جس میں بتایا گیا کہ کنٹونمنٹ بورڈ نے اپنی حدود سے غیرقانونی بورڈز ہٹا دیئے ہیں تاہم شہر کی مختلف شاہراہوں پر بعض عسکری اداروں نے بھی غیرقانونی بورڈز لگا رکھے ہیں جنہیں بل سائن بورڈز ہٹانے کے لئے خطوط لکھ دیئے گئے ہیں۔جسٹس امیر ہانی مسلم نے ریمارکس دیئے کہ عمارتوں پر بڑے بڑے بورڈز لگادیئےاورفٹ ہاتھوں پر چلنے کی جگہ بھی نہیں چھوڑی گئی۔ عدالت نے استفسار کیا کہ 5 سال میں بل بورڈز سے کتنا منافع کمایا اور کہاں خرچ کیا گیا اور کراچی میں تمام اداروں سے بل بورڈز سے حاصل ہونے والی آمدنی کا ریکارڈ طلب کرلیا۔سماعت کے دوران جسٹس امیرہانی نے حکم دیا کہ سپریم کورٹ سے متصل فٹ پاتھ سے رکاوٹیں فوری طور پر ہٹائی جائیں، ان کا کہنا تھا کہ فٹ پاتھ پر رکھے گئے سیمنٹ کے بلاکس عام شہریوں کی نقل و حرکت میں رکاوٹ ہیں، اس لئے تمام رکاوٹیں ہٹا کرراستے کو عوام کے لئے کھولا جائے۔ عدالتی حکم پر انتطامیہ نے فوری طور پر تمام رکاوٹیں ہٹا دی ہیں۔