کراچی،مارکیٹ کمیٹی کے مرکزی دفتر پر چھاپے کے دوران گرفتار تین ملازمین کو تحقیقات میں تعاون کرنے کی یقین دہانی پر رہاکردیاگیا

کراچی(نیوز اپ ڈیٹس)مارکیٹ کمیٹی کے مرکزی دفتر پر چھاپے کے دوران گرفتار تین ملازمین کو تحقیقات میں تعاون کرنے کی یقین دہانی پر رہاکردیاگیاجبکہ تحقیقات کا دائرہ وسیع کردیا گیاہے۔تفصیلات کے مطابق گزشتہ روز مارکیٹ کمیٹی کے مرکزی دفتر میں اینٹی کرپشن کے افسر رتو خان جلبانی اور مجسٹریٹ وسیم احمد کی جانب سے چھاپہ مار کر تین ملازمین نثار سومرو ، جاوید خان اور ماموں کو حراست میں لیا گیا تھا جنہیں تحقیقات میں تعاون کی یقین دہانی کے بعد رہا کردیا گیا ہے اس سلسلے میں اینٹی کرپشن کے افسر رتو خان جلبانی نے بتایا کہ تحقیقات کا دائرہ وسیع کردیاگیا ہے ۔چیئرمین مارکیٹ کمیٹی کو طلب کیا ہے لیکن وہ پیش ہونے سے کترا رہے ہیں ، سبزی منڈی میں دکانوں کی الاٹمنٹ میں بڑے پیمانے پر گھپلے کی تحقیقات میں جو بھی ملوث پایا گیا اس کے خلاف کارروائی ہوگی ، دوسری جانب مارکیٹ کمیٹی کے چیئرمین حاجی علی احمد جوکھیو نے رابطہ کرنے پر بتایا کہ اینٹی کرپشن ماضی کی انتظامیہ ایڈمنسٹریٹر مارکیٹ کمیٹی انور گوپا نگ اور شاہنواز کے دور میں کےے گئے گھپلوں کی تحقیقات کر رہے ہیں جس سے ہمارا کوئی تعلق نہیں ہے ، انہوں نے کہا کہ ہمارے تین ملازمین کو گرفتار نہیں کیا گیا لیکن ہم نے خود انہیں مشیر نامے کیلئے بھیجا تھا جو واپس آگئے ہیں ، انہوں نے کہا کہ اینٹی کرپشن کے ساتھ تحقیقات میں ہر ممکن تعاون کریں گے ۔